reseñas 29. Roba como un artista: las 10 cosas que nadie te ha dicho acerca de ser creativo.

 

Austin Kleon (Ohio, 1983)

Biografía

Austin Kleon é escritor e artista. É autor da colección de poesía Newspaper Blackout. O seu traballo presentouse na edición matutina da National Public Radio, en NewsHour da PBS, The Wall Street Journal e varias páxinas web como 20x200.com. Vive en Austin, Texas e o resto da súa vida pásao en www.austinkleon.com

Por Juli Molares Cardoso.

Profesora axudante doutora do Departamento de Comunicación audiovisual e publicidade da Universidade de Vigo.

Directora da Área de imaxe da Universidade de Vigo.

Comunicadora, deseñadora e personal Brander.

    O verbo roubar e o termo creativo dentro do un mesmo título poden xerar certa confusión. Máis confusión da que xa de seu xera a expresión “ser creativo”, moitas veces asociada unicamente con artistas ou publicistas atormentados, ególatras que durante moito tempo xactáronse de posuír unha habilidade case divina que só uns poucos podían ter. A síndrome do impostor sobrevoaba as mentes daqueles que tentaban pensar fora do espazo acoutado ou do previsible e esperado para eles.

Este libro é unha reflexión breve pero concisa sobre como a creatividade se pode desenvolver, traballar e potenciar en calquera ámbito. Trátase de profundar na túa propia visión e as túas posibilidades creativas, cambiar a forma en como ves e interpretas a túa contorna. A creatividade é vincular cousas de forma diferente, baséase na interpretación, o coñecemento e a experiencia e, por iso é para todos independentemente do campo ou a profesión.

 Sexas quen sexas e fagas o que fagas deberías ser creativo. Este libro ofrece un camiño fácil de seguir sen medos nin inseguridades. Para ser máis creativo necesitas traballar de forma constante e a lume lento os seguintes ingredientes.

Selección de palabras preferidas, 1984.
Colección Nick Cave, the Arts Centre, Melbourne

O primeiro recóllese no propio título, convídache a roubar como un artista, ofréceche unha visión tranquilizadora sobre que nada é completamente orixinal, as ideas son o resultado dunha mestura dunha ou máis dunha. Hai que estar atento a aquilo que nos rodea e anotar os pensamentos ou observacións dignos de roubar e conservar, é necesario construír os teus propio arquivos de roubos. Recompilación que che permitirá recuperalos cando necesites buscar inspiración.

    Por iso, é máis que aconsellable ler todo o tempo, visitar bibliotecas, non se trata tanto do libro co que empezas senón o libro ao que chegas. Hai que ser curioso, hai que buscar referentes, ir cada vez máis lonxe e deixar entrar novas ideas e pensamentos nas nosas vida. Es o resultado daquilo que deixas entrar na túa vida e canto mellores sexan as cousas das que che rodeas, canto mellores sexan as ideas, o ámbito de influencia será maior.

    O segundo ingrediente fai referencia á espera do momento adecuado. Non, non hai que esperar a saber quen es para poñer as cousas en marcha. Crear e facer cousas axúdache a atoparche, por iso debes copiar, aprendes copiando. Aprendes a escribir copiando o abecedario, aprendes a tocar practicando cancións xa escritas... Ninguén nace con voz ou estilo propio, hai que traballalo.

Ademais isto non debe supoñer un problema xa que o ser humano é incapaz de facer copias perfectas, o que si debes saber é a quen queres copiar. Se copias a un referente seguramente te convertas no seu sucesor pero, se roubas por centos de referentes atoparás a túa diferenciación e evolucionarás. Ao buscar referencias a seguir, o bo ladrón honra, estuda, observa múltiples alternativas de roubo, transforma e mestura. Tenta focalizar os teus esforzos naquilo que che gusta, potencia iso, investiga... escribe ti o libro que che gustaría ler.

 O seguinte punto telo integrado no teu corpo, son as túas mans, úsaas!. A falta de conexión directa entre o teu cerebro e as túas mans está a matar o teu traballo. O computador é moi útil para editar ou preparar as ideas antes de publicalas pero non serve para xeralas. É necesario sentir que fas algo co teu corpo, non só coa túa cabeza e moitas veces empezas a editar ideas antes de xeralas e iso é un erro. Por iso se é posible, é moi sano ter dous espazos de traballo separados, un analóxico e outro dixital, un espazo para a creación e outro para a edición.

    Ademais debes poñer en práctica a procrastinación produtiva, os proxectos e os hobbies persoais son importantes. E se che gustan varias cousas, queda con todo, deixa que interactúen e flúan para que xurdan cousas novas, non te preocupes en absoluto por non atopar unha visión completa e unificada. Aí reside a maxia, nesas cousas que fas para pasar o intre e que che gustan e gozas. É necesario sentar, recrearse, perderse e chegar a sitios onde nunca chegarías se estás ocupado. O estar ocupado todo o día potencia a estupidez humana.

  

Imaxe urbana  en Porto.

     Non teñas medo a compartir o teu traballo. Cando o fas aprendes moito do teu público e, se tes algún tipo de temor podes presentar unicamente os puntos de conexión. Tenta contemplar cousas que ninguén máis ve. O mundo é líquido, xa non tes que vivir nun determinado sitio para poder coñecer ou conectar con determinadas persoas, o factor xeográfico xa non manda. É mellor construír o teu propio mundo, o teu propio espazo para pensar, traballar e establecer conexións. Iso si, viaxa, coñece sitios, xa que o teu cerebro entra en zona de confort cando se afai á contorna e non ve nada novo. E coñece xente, moita xente, non só do teu campo, senón persoas que acheguen, xente que che alimente creativa e socialmente.

    Debes ser amable, é moito máis intelixente facer amigos que buscar inimigos. E os amigos fanse dicindo cousas boas deles, sendo amable. Non te enfades, canaliza esa enerxía negativa e produce, ponte a traballar, sácalle rendemento. Xúntate con xente boa, persoas con talento ás que admires, lembra que es tan bo como a xente que che rodea. Se curioso, enérxico, disposto e amable. Casa ben, non só coa túa parella senón tamén cos teus amigos e a xente que che acompaña nos negocios.

    Afástate da idea do xenio creativo consumidor de substancias, cóidate!. Desenvolver e potenciar a túa creatividade necesita moita enerxía, aliméntache e descansa correctamente. Coida tamén o teu peto, aprende canto antes todo o que necesites saber sobre o diñeiro para tentar afastarche do estrés financeiro. Móvete, a inercia mata a creatividade, non te deteñas e planifica. Crea un calendario con metas específicas e anota eses detalles do día a día que che axudarán a lembrar cousas importantes.

    Por último non te esquezas que ser creativo é aprender a restar, é aprender a seleccionar as opcións importantes. Nada limita máis o teu pensamento creativo que as posibilidades infinitas e ilimitadas, iso supón unha invitación ao bloqueo creativo.

 

    E agora que? Agora sal aí fora e empeza a roubar!. Palabra de creativo.

 

Proxecto reseñas. Programación 2022-2023.